قصــائد.. للشــــاعر ضياء الميالــــي

عليك أزعل ....

تتصور عليك ازعل
واسد باب القلب وأرحل
تتصور تجيني بحب واكلك روح ما أقبل
انت بكل ميانه مرخص اعله الروح تجرحها وترد اعليها تدلل
وانا معلم عليك وهاي اليه اسنين تطعني واطيح اكبالك اتوسل
ضميتك جرح بالروح ظل مجروح واتخبل اذا ينشل
هذا انت عزيز شلون متصير وعذب حتى المرار البيك ماينمل
اعذرك ..
واني أعرفك انت غلطان وأغض عيني وأقول القلب يتحمل
سجج صارن جروحي وانت ريل أدوس واقول افيش لو منهن جرح حمل
يافلاح قلبي اليشتل الطعنات حبيبي ومن شتالك باقي أتأمل
فدوه لهذا طولك يانبع ريحان عليه بهالعذاب أرجوك لاتبخل

صاحب طويلة ....

مو صاحب طويله اوياك احنه اثنين مختلفين
ضميتك دمع يفلان واحتاجت بواجي العين
حضر روحك من اليوم اني اوياك مفتركين
من رسمك غسلت العين صدكني ومحيت اسمك
يالوردك ذبل هيهات تدنه النفس واشتمك
ميفيد الحجي التحجيه أصلاً بالي مو يمك
لم روحك الليله وروح وابعد قبل ما اعوفك
مليتك صرت يفلان أشوف العمه ولا أشوفك

تحياتي الكم..