مكتبــــــة الأبوذيــــــات

يهل ناديت بسم هواى عيده
اويه هل ماخذ دليلي اوياك عيده
الگلب مو بس بعد رمضان عيده
عندي العيد من نگعد سويه
==============
مرارتنه يصاحب مرها منكم
وانه المعلول وابحث مرهم الكم
تدري ليش آنه مرهم الكم
آنه ارهم لابو اطباع الوفية
==============
هاك اشعل گلب گلبي وجهاك
اعله حالة راح اعلمنك وجهاك
بشالك من تلف شعرك وجهاك
تلف روحي مثل لف المنيه
==============
كلمن گال سوف اعمل وسبني
چنه بحچيه شتمني وسبني
أگله من الوطن إطلع وسبني
آنه ابني الوطن بثنين اديه
==============
طبع اليحفر بصحراء يعراﮒ
ومن طبع الشجر بالطين يعراﮒ
ومن طبع العراقي ايصيح يعراﮒ
إلك يغدي العمر فدوة وهدية
==============
أشد حبل الوصل والگاه محتال
بسبب لن التريده الروح محتال
سكن گلبي ورضيت ايكون محتال
وجبتله الكرسي ريسته عليه
==============
يظل غامض سؤالي اوياك منحال
وجسمي من السهر وياك منحال
وحياتك صرت يبن الناس منحال
العسل حصتك وانه اللسعات بيه
==============
يحلوة الطول من تمشين بالراح
بمشيتچ مو طحنتي الگلب بالراح
تعذبت وصفگت الراح بالراح
وراحت روحي من مريتي بيه
==============
علي دنياي صبت غيض چزيت
وروحي من القهر والضيم جزيت
عشرتك والإسم فد نوب چزيت
السبب مديت إيدي وعطت بيه
==============
تعال اگعد نصفي الإلك ولي
عليه انوب ياهي تريد ولي
گتله خل ابوسك گال ولي
شنهي تبوسني وتنگ عليه
==============
شفكن من هواكم بعد شفتك
وعلي طفر عسل من حچت شفتك
طحت كلي اعله كلي بيوم شفتك
دگضني مو طحت كلي عليه
==============
عليل ومن بست شفتك شفتني
ولتگلي العشگ فتك شفتني
اذا كلك طحت لمن شفتني
أنه اتوذر إذا تخطف عليه
==============
مريض آنه وصعد مرضي على اشفاي
وطب لندن فلا يلحگ على اشفاي
حبيبي من تحط شفتك على اشفاي
أطيب وكل مرض مايضل بيه
==============
صرت كلي جرح بجفاك ودي
وشوفك كل مسه ومصباح ودي
إذا خلص رصيدك علي ودي
أمد شريان وانته اتصل بيه
==============
جمال وچان عندك كله فتنه
واجب رغم حچيك كله فتنه
تدري اشگد فرگتك كلفتنه
مثل الراح دفان بأخيه
==============
هله ياللي عشرتي اوياك_مأسات
إلك خدين بيض أتگول ماسات
أسكر لو شفاي شفاك ماسات
واذوب ومايظل كل حيل بيه
==============
وحگ الألف والآمين والها
ابعدها ماتسله الگلب ولها
الشمس صارت مناصف إلي والها
بخدها النور وآنه النار بيه
==============
يون بسمك دليلي انته وانته
تاه وأرد اسألك انته وانته
يحب اثنين غيرك انته وانته
تركني وإنته بس ضليت بيه
==============
زرعت الدرب لجلك وردة وردة
وعذب منهل ودادك وارد اوردة
مثل يعقوب حالي ورده ورده
لاردلي القميص ولاله جيه
==============
ببعادك صفيت اشبه خرابة
واحس بيتي علي وحشة خرابة
يوم اليگظي من دونك خرة بيه
الموت اهون ولابعدك عليه
==============
من زغري الحزن والضيم چلباي
ويروحي بحبل صبرﭺ حيل چلباي
أكل عظمي او وفه وياي چلباي
وبعضهم أكل لحمي وخان بيه
==============
وحگ من ذا الذي أسرى ولعراج
على الشينات ماردن ولا اعراج
العتب مو على الما يمشي والعراج
العتب على الصاحي ميسويله جيه
==============
طحت مابيه حيل اعدل ولا اعوج
ودليلي ابنار لهابة ولع وج
اتشمت بيه الصاحي والاعوج
وغمان الوكت سولفوا بيه
==============
حبيبي بيا بخت وياي شديت
وگلي بهجرك شقدمت شديت
إصبعك حتى تذكر خيط شديت
انحصر دمك ولافكرت بيه
==============
بعد شتأمن من الخان شرجاي
وعلي غير شمالك صار شرجاي
أعرفك من تجيني اوياك شر جاي
وتطش يمي المصايب واهليه
==============
انياب الدهر عضن من شراها
وبالله ارجوك كفني من شراها
صحت للبيع روحي من شراها
شراها الچان يحلملي بأذيه
==============
تبلل ثوب حزني ما شريته
مشه وريته اعله گلبي ماشي ريته
حل بية الشراني ماشريته
شريت الباعني ومارحم بيه
==============
احلفت ماأبچي بفراگك ولانوح
وبعد ما ردد بإسمك ولانوح
يوسف مبتله مثلي ولانوح
ولايعقوب مر مثلي بأذيه
==============
أعلن ياگلب حبك وشيعه
واتبع راي كل مخلص وشيعه
عيب حچاية السنة وشيعة
الوطن لاهل الوطن كلهم سويه
==============
آخ اشگد احبنكم واجلكم
وگلبي انشلع من صدري واجلكم
أنه اتمنه يحين اجلي وأجلكم
بگبر واحد يدفنونه سويه
==============
جفيت وخلفت بجفاك عبرات
ونيني وصل سابع جار عبرات
أنه الشاطر عليه اشلون عبرات
مشه وماچلبت بثنين اديه
==============
شجاك شبيك لامريت لايت
وهاي الروح عگبك حيل لايت
يبو عيون الوسيعة تگول لايت
ضرير آنه دحط عينك عليه
==============
ونيني لاسنة بطل ولاعام
وسجني خاص الي وحدي ولاعام
أخبرك لا أخو ينفع ولاعم
بس الله العزيز يحن عليه
==============
صفت شمس الضحه بالعين ظلماي
حزين ولا بقه بالعين ظلماي
أنه المظلوم محد عرف ظلماي
جفوني العشت وياهم سويه
==============
حرت مابين أتاني ماأتاني
وعدد شماتي يمكن ماأتاني
انتظرته هواي تالي ماأتاني
ماريده بعد لو حب اديه
==============
أون ومن ونيني اعضاي خوان
شجاني وماعرفت الوكت خوان
حسافة الچنت اعدهم إلي خوان
صفوا عدوان بعد الصار بيه
==============
الدهر بس البراسه اجنون يمنه
غدر بيه وبجاري الچان يمنه
ماتنتصر يسرة بغير يمنة
ولا يمنه وحدها اتحل قضية
==============
الدهر أغضب عليه ودار وجها
وبنيرانه چوه احشاي وجها
صديقك لو زلف عالعدل وجها
مو بالعكس تحفرله ابهبيه
==============
جره دمعي على الوجنات ياحيف
على اللي مايقدر التعب ياحيف
آنه الچنت اخوف خفت ياحيف
ولذت بالچانوا يلوذون بيه
==============
حنيني اعليك أمك ماتحنه
وظهري لغير شخصك ماتحنه
أسف چفي بمحبتك ماتحنه
تحنه دموم من گلبي الخطيه
==============
لاتأشر على الماشي ولتصح
وخوة صدﮒ ماظلت ولتصح
اعضامي أبد ماتبره ولتصح
أصحه لو يمر ذكرك عليه
==============
عيني من الزغر دمعي نغمها
وروحي ما بعد يطرب نغمها
الدنيا اخلاف عشرتكم نغمها
مثل موته انتمشه اعله الوطيه
==============
علي مرت يناهي ايام سودة
واريد اصبغ اهدومي اعليك سودة
حبك بالگلب والروح سوده
أونن والطبيب احتار بيه
==============
كل من شاف حالي أبد مالام
وعرفني وشاف جرحي كلف مالام
صرت مثل الطفل بالمهد مالام
يتيم وعيشته كلش رديه
==============
يهل ناوي على الهجران وك تان
خامك لاتخبطه بصوف وكتان
بالدنية يمر عالبشر وكتان
وكت راحة اوكت كله أذيه
==============
يلايم لا تلوم الگلب بسعاد
صدﮒ ناس بضليمة وناس بسعاد
يهل گاعد توالي الليل بسعاد
تذكرني بوليفي الخان بيه
==============
هلال افراگم روحي وهلها
ودمعتي مرة أكفكفها وهلها
البصرة وكل نواحيها واهلها
الوجودك فرحت وأدت تحيه
==============
عذاب الشوﮒ شبگ ساعديني
وساعة انخه الأيمة ساعة ديني
على نص المصايب ساعديني
كلف ظيم العشگ كله عليه
==============
وحگ صفين والخندق وحطين
أملش الراس بغيابك وحط طين
واطير من الفرح صدﮒ وحطين
إذا بالطيف مرة اتمر عليه
==============
أخوي اللي ردت وياه نبله
رماني وشج الي بحشاي نبلة
إذا إحنه امن اهلنه النوب نبله
اشتظن نرجه الغريب اعله الحمية
==============
العگل تكين تك انجن وشل تك
بسبب داريتك بزغرك وشلتك
عصرتك عصر بچفوفي وشلتك
لگيتك بس عذاب ونوح اليه
==============
بچيت وبالدمع للعين صفيت
اخبطوا ياما اخبطو واشكثر صفيت
يصاحب ويه دهري اشبيك صفيت
انطبگتوا اثنينكم عدوان اليه
==============
آنه الماعرفت اولك من اتلاك
وياهو البالحسن گبلك من اتلاك
يعشعش وهم بعيوني من اتلاك
كتاب وصعب تفسيره عليه
==============
بصحن شوگك يروحي دوم نطفه
ولا من نار حبك يوم نطفه
أحبك ياترف من چنت نطفة
وكاروكك بتوتي وذني ادية
==============
أشوف العمر لايسوه بلاهم
ولو منهم علي زايد بلاهم
وينه المسعد وعايش بلا هم
واسأله اعله الفرح ميمر عليه
==============
الحزن ماينحسب لو ردت عده
على المبعد واخذها الروح عده
يعمري اللي على العشرين عده
ظلمة وهالليالي تمر خفيه
==============
حبيبي لاتظن الدهر سرنه
هجرنه ديارنه وللغرب سرنه
وحياتك ماظهر للغير سرنه
بس دمعي فضحني وعم عليه
==============
شمالك بيه مافد يوم حسيت
واحس جرحك بماي العين حسيت
تدري بيوم عني ارحلت حسيت
العمر وي روحتك راح من اديه
==============
شجاها عليك خلانك وربعاك
كلهم كلو من طيبك وربعاك
ثلث ترباعك انته الهم وربعاك
حمه للگاصدك يشكي الأذيه
==============
طفل گلبي بغيابك ماله والي
غده الشيب اعله راسي ماله والي
عضو من اعضاي وكتي ما لوالي
لچن ضيمك لواني وعم عليه
==============
جفوني اغطاك وعيوني وسدلك
أبيع سنيني يالغالي وسدلك
أصيرن فيض عالشامت واسدلك
واصد اسهام عذالك بديه
==============
وحگ الفوﮒ ماتت راس ابيها
يظل حبك بروحي راسي بيها
بعشرتك إذا گطعوا راسي بيها
ولا أتخله عنك للمنيه
==============
يأن الگلب وتأثر بما أن
واظن الروح ماتطفه بماءا
طحت گدامك وگتلي بما أن
طلبت العون مني اتبوس اديه
==============
عدت ياما وبعد كافي شعدلك
واعوج صعب تعديلك شعدلك
خمسة خمسطعش عشرة شعدلك
جزن مليون دگاتك اليه
==============
أنه الما كرر بحچيي ولاعيد
ولا أحسب بزلاتك لاعيد
شمالك ماتمر بيه لاعيد
الخلل مدري بجنابك مدري بيه
==============
أقدم الروح لحبابي وسلم
واصافح راحتي بچفهم وسلم
يارب العرش صلي وسلم
على المصطفى وآله بكل مسيه
==============
إلك مني سلام وألف مرحب
شكثر مرت صداقة شكثر مر حب
وحگ اللي طبر بالسيف مرحب
تظل انته صديق وأخ اليه
==============
جره دمعي على الوجنة وسيله
على الماصار الي اوياهم وسيلة
أدور المبتلي مثلي وسيله
المصيبة اعليك مثل العليه
==============
حبيبي بالگصايب يلف وي حيل
بمرضي گالت الشمات وي حيل
وعلى الكلفات أطبگ حيل وي حيل
واصيرن سبع واتحده الرديه
==============
اگطعت خيط الوصل عني والف لاك
ومثلي مايصح يشگر ولف لاك
بألف مليون مابيعك ولافلاك
عجب وانته برخيص تسوم بيه
==============
صديقي ما أبدله بذهب لو مال
واصيرله سند للحمل لو مال
خاف تگول مني تعب لو مل
أضل اوياك لأخر نفس بيه
==============
أجيت اطلب النخوة من نخوتك
لگيتك يمي حاضر من نخيتك
إذا يسألني سائل من أخوتك
أگولن إنته اخويه وهاي هيه
==============
أطوف لخاطرك وافتر بلادين
واعوم بحور دنياتك بلادين
أصبح كافر وأمسي بلادين
ولجلك خل توافيني المنية
==============
أجيب السم بدية ولهمنه
على الناكر هوانه والهملنه
خل الفرح عندك والهم النه
المهم إنته سعيد وهاي هيه
==============
حظوظ الناس حلوة ماله حظنه
ومثل حسنك ياغالي ما لحظنه
كون اليوم شخصك مال احظنه
قسم إسنين ماهده من اديه
==============
وگع ميزاني بحبك والك دﮒ
وگلبي المايدگـ لحد والك دﮒ
جهازي اتصل من وحده والك دﮒ
لأن اثنينه انحبك سوية
==============
الشرب من ضاﮒ طعم اشفاك سكر
فقد وعيه وصعدله النوب سكر
بعت من حصتي گونيتين سكر
واخوط الچاي والشفة سويه
==============
لاتظلم دليلي اياك واياك
انه انطيتك وچف الغير وياك
صدﮒ من عليه تهد وياك
أهد وافزع واطگ بثنين اديه
==============
هاتعبني حبك هايذاني
دخت هاياصلاتي هايذاني
أگول التوبة ماحب هايذاني
أهد ذاني ويرد حبك عليه
==============
عسل وبحلگي وكتي مرجعلكم
ومرجعكم لگلبي ومرجعلكم
صرت آية بهواكم مرجعلكم
خذيتوا منين فتوى وخنتوا بيه
==============
إبني اقصور ابد لتظن بنادم
انجرحنه لچن مابين بنادم
إبنها مو شرط يطلع بنادم
إذا حوه اطلعت موش آدميه
==============
اللولة البيك چي مابيك لوله
ملاك من السمه البالمهد لوله
جمالك ماتجاوز بشر لوله
الخمرة اويه العسل طبگن سويه
==============
وحگ الساكنين الشام ويران
عفه عيوني يشوفن بعد ويران
أخابرلك وخطك يدﮒ ويرن
الف نعله اعله ابيك رد عليه
==============
العجايب سبعة غيره ماعجبني
وعجبني شلون اگولن ماعجبني
جبن هو وشبگته وماع جبني
ولحد الآن احس مايع بديه
==============
بحة صوته تكتل منسه بحته
ويوشل الماي كله من سبحته
تشوفه تگول مومن من سبحته
وهو كلاوي ويلعب عليه
==============
هجرك حيل خايب مرضاني
زعلت وعگب شخصك من رضاني
ترض صدري وتگلي مرضاني
ولا چنك سحگت انته عليه
==============
بوادي الشوﮒ احس صوتي دوالك
ودليلي اشموع الك عشرة دوالك
إذا گالولك بكتلي دوه لك
شتظن بدواك روحي تعز عليه
==============
شلت منه وتبعني هم لگاني
لگاني وشلگاني هم لگاني
عسل ظنه بعدني هم لگاني
صرت سم وخذت ثارات اليه
==============
أريد العشرة انه اطويها ولفها
بسبب لن الغدر بيها ولفها
جروحي الفين احسبها والفها
يعد الفين من تجبل عليه
==============
بصفگات وهلاهل ودعاني
وهو الكتل حبنه وادعاني
وده ابچي وانوحن وده اعاني
وده مايمر الفرح بيه
==============
من همي الصخور اتموت واذيب
وعلي دنياي تجمع ظيم واذب
إبن آوه انجمع والضبع والذيب
اليطلع الشاة وينه البي حميه
==============
برشا اسمه ذهب فضة ومسي
وصگار الريال ايتو ومسي
أصبح بس لهل برشا وامسي
واظل برشاوي لاخر نفس بيه
==============
من جن برشلونة مو إنسته
والجمهور متعته ونسته
لزم طوبة لقه نظرة انيستا
وزرف الاشباﭺ بالضربة القوية
==============
ذكرت احبابي هالليلة وحنيت
وحنة خذت من دمعي وحنيت
صحيح العمر ماخذني وحنيت
أنه هذا وبگت روحي أبيه
==============
مشه حادي الظعن بالعيس وحده
وگلبي شلون يگظي الليل وحده
اذا غيرﭺ أحب مجبور وحدة
إنتي اوياﭺ احبنكم سويه
==============
نفس واحتاج شمك ياهوانه
العمر ذلة بغيابك ياهوانه
أتيه روحي يمك ياهو آنه
خيالك مرة دلاني عليه
==============
تره الدنيه صفت مو دنيه بعداك
ولذت ياريت بالخوان بعداك
أنه امن اذكر الغربة وطول بعداك
أبچي الليل وانجومه علية
==============
أصد وازعل وادير العين طبعن
لأن لچمات الك بالگلب طبعن
حلو وتنحب ولكن بيك طبعين
تشك وتغار من روحك عليه
==============
لتظن نار گلبي اعليك تبرد
وبعد كل الحچيته اوياك تبرد
شوكت ماجيك بالسچين تبرد
دهاك اذبحني هو شضال بية
==============
أشوفك صعب من تعله شنش بيك
وچنت ملتم علي كلك شنش بيك
علي زعلان شالقصة شنو شبيك
ولاچنك أمس نمت اعله ادية
==============
أحس الموت واگفلي ويومي
واضن گربت منيتي آنه ويومي
أريد اگعد أنه الليلة وي امي
گبل ماروحن بثوب المنية
==============
گلبي ساعة الك ينبض سعالي
ولاأنسه أبد كلمن سعالي
أسعل شنهي ماتسمع سعالي
وعلى شفافك تحمل صيدلية
==============
أسف منك كل اهمومي والآلام
وجرحي اوياك مايشفه ولالم
ورغم كل هذا ماعاتب ولالوم
وانته بكل صلافة تلوم بية
==============
گطرة حيه آنه واتگصة
يعرفنه النشد عنه والتگصه
إحنه بجسم واحد والتگصه
چفك لاتضن گصيت ادية
==============
أأمرني والبيلك عسلبيك
وعساهن بيه يفترن عسه البيك
حنظل لو ضگت خدي عسل بيك
وشفتك للنحل وجبة شهية
==============
أريد امشي نهار الصيف واسعه
على ام حلگ الزغير وعين وسعة
يحفار الگبر بالله وسعه
بلكي اتصير موتتنه سوية
==============
بعد ما أغزل لغيري ولاحوك
لأن لارد اليستاهل ولحگ
غشمة وصوبوك انته ولاحوك
وعنتر بالحچي صاير علية
==============
بعدك گمت اسوي النوح ويبات
ولا خلي دليلي ايهيم وي بت
الحزن وياي طول الليل ويبات
بفراشي ويسولفلي علية
==============
عميت ولانفع حدي وسني
ولاواحد عرف حالي وسني
سنون الناس عضتني وسني
ماعضني لچن يضحك علية
==============
الملوك احنه الكبار احنه والابطال
وانتو ازغار وانظمكم بالابطال
أخذنه الكاس والدوري والابطال
وحمسناكم بستة عدال مية
==============
أصفن بيك من ظيمي وسه لن
اصعاب البيك ماذلن وسهلا
تگلي بالوجه أهلا وسهلا
واحسك بالظهر سچين بيه
==============
وحگ العين ثم اللام واليا
عليك انشد من اللي راح واليا
ولاني هالزمان شلون ولية
واخذ مني العزيز وخان بية
==============
تعجب حته بعيوبك ولولاك
ويبخته اللي لزم مهدك ولولاك
بوجودك دنيتي حلوة ولولاك
وحشة وخالية من الفرح هيه
==============
أهلك من حلات البيك ميتين
ومي مشمش خدودك مرة مي تين
اليبوسك صعد سكره 200
واذا آنه ارد ابوسك 900
==============
من شفتك رجف گلبي واختلك
وبين اعيوني اظمنك واختلك
كون ايصير أخ ليه واخت لك
وگصة بگصة ونحل القضية
==============
الورانه ايظل ورانه مايعدنه
وخسر كلمن بصحبة مايعدنه
الچان الخبز عده ماي عدنه
باچر يغص من يطي اميه
==============
مبلل مايهمني المطر من صاب
وميت مايهمني السهم من صاب
هدف وبساحة الميدان منصاب
ثابت يالتريد الطعن بية
==============
وحگ الريت والياريت والليت
مفرع واندعي من يوم وليت
يوالي من علي بجفاك وليت
وبعد عينك منو العينه علية
==============
حبيبي اجروح الك بالروح حالن
وامس چنت احسن من اليوم حالا
أريدك تنتخيلي وتجي حالا
باچر وين ماتلحگ عليه
==============
عليكم من سلام الله ورحمة
وحن اعله الگلب مرة وارحمه
إذا رايد أجر إنته ورحمة
تعال انطيني بوسة وحن عليه
==============
طحتلي بناس عگبك فطراني
ونهر يابس وهجرك فطراني
صوتك وآنه صايم فطراني
منشوفن صورتك شيصير بيه
==============
بإلاهك أرد احلفنه وإلاهي
صدﮒ يفلان ناسيني ولاهي
لاهو الموت اخذ روحي ولاهي
تشوف احبابها وترتاح هيه
==============
شكثر ضحالك گليبي وفالاك
وتبعتك خيط تتخلبص وفلاك
شسوي شصك بحلگي وفالاك
بظهري وشبچتك طبگت عليه
==============
أريد اسأل اعيوني شلون شفتن
جماله ولمن تبسمت شفتين
كون الزملي واجب حرس شفتين
هم احميه وهم نگعد سويه
==============
على گلبي حمامة شوگـ حلت
وزهت دنياني والأيام حلت
أنه اترجاك يااستاد حلت
غلط لو صح متسوه انطيها مية
==============
صب دمعي على الوجنات ياهل
وماتدرون بية اشصار ياهل
صرت عصفور چني بيد ياهل
أهو يلعب وآنه اشلون بيه
==============
شهر سيفه الدهر ضدي وسله
نساني وراح وي غيري وسله
عنب ماحصلت منه وسلة
طلع ذيب وكتلني اربات اديه
==============
حبك من شفاف الگلب عت باي
ولانوبة اذكرتنه واصلت عتباي
أعتب مانفع وياك عتباي
على ياهي اگطعت وصلك عليه
==============
گلبي مافرح عگبك ولاسار
وجدمي ماخطه لغيرك ولاسار
أخبرك مابگت چلمة ولاسر
فضحني الدمع من غصبن عليه
==============
حبي إلك مافد يوم ينگص
وليش الصاحب امن ايغيب ينگص
زمن خله الحديد بخشب ينگص
ويخلي الماله أول بالثنيه
==============
أسگي ضماي من اشفاك وارده
يالخدك جميل اتگول وردة
ردية احوالي يبن الناس وارده
إذا بالبوسة هم تبخل عليه
==============
بسك يافرح وشوكت شفتك
تطوخت بغرامك حين شفتك
مريض آنه ودواي بطرف شفتك
تصل لشفاي واشفه من الرديه
==============
بية اجروح يصعب علي شلها
وجور الوكت كل اعضاي شلها
الدنيه اوياي من غاياب شلها
خذت حيلي وبعد شتريد بيه
==============
حبيبي آنه منك وانته مني
واحس كلمن يونلك ونته مني
إجت احزان دهرك واتمن لي
وصرت يفلان مأوى لكل رزية
==============
تشوف اهمومي بعيونك وترها
وتغيب وتگطع بروحي وترها
يرهيك الوكت يسمر وترها
وتصير انته أبو الراهي عليه
==============
سره گلبي بدرب حبك ومارد
أصيح وماسمع صوتي ومارد
مصباح آنه اصيرنلك ومارد
واخدمك ياترف بثنين اديه
==============
همومي براسي لابسها كليتة
ومثلي من الفگر بايع كليته
جعت ولساني من جوعي كليته
رضيت اخرس ولاأرضه بعطية
==============
امتحنتك ردت اجربنك صح اتحل
تشد جرحي واذا يشفه صحت حل
بعدني ماطحت يمك صحت حل
لو طايح صدﮒ شتسوي بيه
==============
زاد بگلبي شوگك وانته قل بيه
وصعد للراس حبك وانتقل بيه
أحب شلون غيرك وانته قلبي
وانه بگلبي أحبن مو بديه
==============
يحلوة الزعل طول صاحبينه
بهجرچ عظم ماظل صاحي بينه
چنه برضه وچانت صحة بينه
زعلتي وزعلت الصحة عليه
==============
شتظن تلحگ علية الأوف لالا
بليل اوداع خدة اشتعل لالا
أگله ارجع يگلي انتهت لالا
لقد تم البعد غصبن عليه
==============
الزمان اشكال لابن آدم يراوي
واخذ مني قصص واكتب يرواي
أنه الربيتهم طلعوا يراوي
اكبروا وتعلمو عضات بية
==============
مجرد شك اشكن هاشكشبيك
تكش بوجهي لكن هاشكشبيك
أشگ حلگه اليغثك ها شكو شبيك
واذا اغثك أشگ حلگي بديه
==============
أرى جرح العشگ يكبر وارى الدم
دخت بيك وگمت أدعم واردم
مو للدوم احبنك وره الدوم
واگول مقصر وحقك عليه
==============
عيوني غوشن ماشوف قفلن
وبس اعليك گلبي انقفل قفلآ
تريد اتروح قف لتروح قف لن
شگل للناس قد راح من اديه
==============
وحگ ارموشك الحلوة وعينك
أنه بالشدة أوگفلك وعينك
لون بيدي لنصبنك وعينك
ملك تحكم على كل البرية
==============
باد الحيل واتعس بيده هاية
وطلع ماكر حبيبي بي دهاية
سالمني وشبگني بيده هاية
وبيده الثانية يأشر عليه
==============
إجيت تگلي خل نرجع بعدما
حكمت اعله العشگ كله بعدما
بعد ماصدﮒ بحچيك بعد ما
بعدما تگدر اتقشمر عليه
==============
المثلك كون يعرف قدر نفسه
وكون النافسك بالخير نفسه
بلال الشال صخرة انگطع نفسه
وانه الممنون اشيلنك بديه
==============
إلك شفتين تكتل ولعني
واحسها بنار تحرﮒ ولعني
شني مسودن واگلك ولي عني
لو شارب نفط وجنون بيه
==============
الجگارة بنار دلالي ورثها
وعاين دنيتي وشنهي ورثها
أخذها الروح ترثيلك ورثها
ساعة انته تنوح وساعة هيه
==============
من دمعي جرن نهرين وعيون
ولخليلك الف حراس وعيون
شلون خدود عندك ولفي وعيون
كبار ومحله نظرتهن عليه
==============
أريد آخذ قصط راحة من الراح
بچيت وربعي سألوني من الراح
شجاني وماخذت عبرة من الراح
ولا بالجاي عبرة اتصير اليه
==============
افتحت صدري لسهامه من رماني
وشفته وگلت مدري من رماني
بفيي وگعد ياكل من رماني
ويحسب للشته شچم غصن بيه
==============
بين ظلوعي شلتك ماهملتك
وبقيت بجفن عيني ماهملتك
حسبالي الخيانة ماهي ملتك
لچن هسه اتضح كلكم سويه
==============
بعد من نار شوگي من جمالك
يهالغاير غاير جمالك من جمالك
ثكيل الصحرة تشكي من جمالك
واذا تصعد جمل تنكسر هيه
==============
هله ياللي على الفطرة هوانه
وينعشك لو يمر مرة هوانه
إذا تسأل على اليوفي هو آنه
أفزع باول صياحك عليه
==============
مثل مرجوحة بي رايح ورادود
ولولي بصوت لاناعي ورادود
من يمشي الحلو يمشي ورا دود
امن اشبگة الدود يتكوم عليه
==============
بابي المانهر چفك من اندﮒ
ودعاين آنه لو وكتي من اندﮒ
حنطة وطبعي اظل واگف من اندﮒ
أغزر بالوفي وبالذاته ابيه
==============
يامن ما لغيره الگلب يامن
رضه گلبك علينه انگول يامن
أنشدك إنته امس مريت يامن
وراك الناس تتراكض خطية
==============
كم من عمري خلصته وراكم
وگضيت اسنين بس اركض وراكم
بعت عمري تره لحبكم وراكم
بدال المشتره تبيعون بيه
==============
المصايب أمنن بية ولاذن
بغيابك لانظر عندي ولاذان
وحشة غروب المفارﮒ ولاذان
العديلة تگول يقروها عليه
==============
منهو النكر عهده من عهد من
انهدم گلبك وگلبي منع هد من
عشگنه اتعرف عهده من عهد من
گبل الاسلام هسه تخون بيه
==============
عطش گلبي بمحبتك ماي اتاني
وبعد ماظن ينطرك مايتاني
تعال وشوف حالي ميت آني
بس الروح گوه مچلبة بيه
==============
جرح گلبي شعمل بيه وشده
نزف محد گرب يمه وشده
وگفت بكل مصيبة الهم وشدة
انعم الله اعليك محد گال اليه
==============
اذا نترك ودادك وانتنازل
إحرگ جدنه الاول وانتَه نازل
بعد روحي أحطك وانته نازل
وسط گلبي واريد اقرب شويه
==============
أصيلة الروح تنشد من خيالي
وافز مرات اخافن من خيالي
شكثر حاولت احذفك من خيالي
خيالي انحذف وانته الضال اليه
==============

يسسسسسلمو ابوذيات جميلة

;lpok

تسلم خيو كناري على هذه الابوذيات الجميله

شكرا كناري بس قريت يمكن بس عشرين

شكراااااا سحر على مرورك الجميل
تحياتي

يسلموووووو نور نورتي الموضوع على رد الجميل
تحياتي
شكرااااااا طائر حبي
نورت بردك الجميل
احيااااااااتي

يسسسسسسسسسسسسسلموا يا راقي على الابوذيات
تحياتي الك

[ندعوك للتسجيل في المنتدى أو التعريف بنفسك لمعاينة هذا الرابط]

ڳل من يڳرهني أمامڳ خمسةأصآبع خير ٲڷآمۈڒ أۇسطهآ

ابوذياااااات روعة

يسلمو كناري ع الموضوع

شكرااااا سليل على رد الجميل
تحياتي

شكرااااااا زمن نورتي الموضوع على رد الجميل
تحياتي

يسلمو خيو كناري ابوذيات روعه

ومكتبه راقيه يا غالي

تحياتي

[ندعوك للتسجيل في المنتدى أو التعريف بنفسك لمعاينة هذه الصورة]

أنت القصة - التِي لا اُريدُ أنّ يكُونَ لها نهاية ♥

بسك يافرح وشوكت شفتك
تطوخت بغرامك حين شفتك
مريض آنه ودواي بطرف شفتك
تصل لشفاي واشفه من الرديه

عاشـــــت الايادي

نقل جميــــل

تحيااااااااتي كناررري

شكرااااا هدة نورتي الموضوع برد الجميل
تحياتي

يسلمو حيدر على ردك الروعة
تحياتي

شكرا يا وردة اختيار جميل
تحياتي

شكرااااا برنس تورت الموضوع
على رد الجميل
تحياتي

يسلموووووووووو
عالابوذيات الجميله
تحياتي الك

أحزان قلبي لا تزول.....حتى أبشر بالقبول

وأرى كتابي باليمين.....وتقر عيني بالرسول

[ندعوك للتسجيل في المنتدى أو التعريف بنفسك لمعاينة هذه الصورة]

ابوذيات روعة .