دروب الـــــــــرحيل !!!

إذا طيوفك ما تفارق خيالي ..

.............. بنسى الخيال وكل فكره تصوّرت ..

علمتني ياوقت مما جرالي ..

............... والحمد لله يازماني تطوّرت ..

عن غزير المشاعر ما يعبّر كلام ..
................. سامح الله لساني في وداعك .. بخيل !

كان بيني وبينك بالعيون إنسجام ..
.............. كان قلبك عليل ، وكان قلبي عليل

لين شحّت حروفك خلف جود الغمام ..
.............. وإبتدا دمع عينك فوق خدّك يسيل

شفت حرفٍ غريق يقول / مات الغرام ..
.................. جار ظرفي وأمانه روح دوّر بديل

هزّ فرقاك قلبي يوم أضمّك وحام ..
................ طار ضيق وزفيري هزّ جذع الجديل

قلت يانور دربي خلّ عنك الخصام ..
................. صعب تصغر بعيني وأنت قدرك جليل

يوم تبعد وترحل كيف عينك تنام ؟
................ والدّموع تعدي لك في ( درووب الرّحيل ) !

وش سبايب رحيلك ؟ صدّ مثلك حرام
................. خابر إنّك عشاني تعشق المستحيل

خابر إنّي عشانك أكره الإنهزام ..
................. وأسرج أصعب ظروفي لجل لقياك .. خيل

كنت أظلّك بصدري عن شموس الحيام
................. عن غياب الحبايب وأنت عابر سبيل

كنت أداري شعورك وأحرسك بـ اهتمام
................ وأعطي الشمس وجهي لجل أوفّر مقيل !

بعد هذا بفاسك تحطبين العظام ؟!
................. آه يا صدري اللي ما بقى فيه حيل

أصدق أحداث حبّي / كان مابه ظلام ..
............... وأكذب العذر قولك / كنت حطّاب ليل !!

لا تبرّر غيابك ما يفيد الكلام ..
............... قلب وظّفك خلّه من هواه إستقيل

استويت بعيونك / حرّ عافك وشام !
.............. واستويت بعيوني / قلب ناكر جميل !!

ما بقى غير جمله وإعتبرها ختام ..
............... سهّل الله طريقك لا نويت الرّحيل .