خــــــــــــــــــــــــربت!!! للشاعر الديواني ضرغام العراقي

خربت!

خربت من شفت جنحان عند الفيل ومن شفت النوارس صارت ذيابه

وخربت من شفت مره الأسد مرعوب خايف ما طلع بالليل للغابه!

مجنون الزمن لو عقلي انه المجنون هذا الشفته من هو اليعرف اسبابه؟

وجبت ايدي غصب گتلهه فركي العين بلكي مو صدگ وينچ يا سبّابه!

تالي اتيقنت موبس حلم لا طيف واقع حال بس ظنوني مرتابه

شفت الناس .. بعض الناس .. غير الناس
شفت الناس نفس الشفته بالغابه

واحد من يهد ويهد گبل بالسيف عاف السيف هسه وينخه بگرابه

واحد مقتنع يوسف كلاه الذيب وتگله چذب وايگول لا يابه !!!

واحد ما دره ما يعرف الي صار شاهد راح لمن صارت اطلابه

واحد ينسأل تعرفهه بت فلان جاوبهم چذب وايگول حبابه

واحد چان واحد هسه صار اثنان لأن وجهين عنده وغاش اصحابه

أو .. واحد ..
أو .. واحد ..
أو .. واحد ..

والاضرب بعد سألوا طفل بالعيد شتحب تشتري شنجيب لـعّابه؟

دبابه صرخ يلعب حرب وايريد ميعيّد اذا ماعنده دبابه !

وطفل ثاني شرد يذرع شوارع گام ويكره للأسف مدرسته وكتابه

وطفل ثالث .. وطفل رابع .. وطفل خامس ..

واخيراً

مجنون الزمن فعلاً طلع دولاب وبكيفه يفر لو راد دولابه ..

وبكيفه يفر لو راد دولابه

للشاعر الديواني
ضرغام العراقي