بليغ الحب

قصيدة (بليغ الحب)


قانون الجذب تجذبنه بس الكَاع
شو حسنك تجذبه الكَمره لو طلّت
لان صارت امرايه ابساعة المرّيت
حفظت صورتك من وخرّت ظلت


************

لأن عشكَك قصيدة ابلاية مطلــــــع
بس بالحيره صـدّكَ قانـــع اني

ولأن عطرك صفه من حِسن هل ريح
صرت ناي واشم وانطق معاني

باطل وصفي اظن كل هذا مو شوف
لأن شفاف ما اشوفك تـــــراني

منك هم ثمر هم عزة وفياي
نخلة ابداخلي وكَلبي هزاني

يكَولون الظلام ايضّيع اظلال
لأن وجهك ضوه ظله نوراني

يل ظلك الكحله وجنك العين
وتتجمل الكَاع اللي تصدلـه

كَمر تبقى اببحر وشما كَصه الليل
ثابت والشمس ضيهه غركَله

اذا دهرك يشّوف الناس اشكال
يشوف ادهور منسيه تخـــله

مو مضرب مثل للحِسن تنكَال
فعل الحِسن انت وانت قوله

يل شايل جمال ولو تعافيت
متشيله ... يصير الكَاع وايشيل

يتمثال الجمال الماله ممثول
يا شخص الجمال الماله تمثيل

ميـــــدوزا صبح يعبدهه عيـــنك (1)
اولى والرمش فوكَاهه اكليــــــل

على عرش الحِسن شذره انت عالتاج
العرش تاج الارض وانت أشذر الجيل

انت شهرزادوانه أزمـــــان
الألف ليلة بشفاهك فرد همــــسه

يل صوتك عذب رشفة الاذنين
سر عمر السمع صوتك أحسه

يلن للحب حضارة احشاك اثار
منهو للحسن متحف ابنـــــفسه؟؟

يلبشعرك خرز صارت ولايات
خيط النور هوه وانت شمسه

احلى نزهه ياخذ هل نفَس بيك
ويذوب النفس بيك وانت سره

يل شوفك يغطي الما يغطيــــــه
يل حتى الورد بالندى اتسكـــــره

صح ابجي ولكن صور دمعات
بــــتراب الكحل ادفـــــــــن ألعبره

وتلجمني وتكرر حتى انســــــاك
وألـــجمني اكَــــــــــلك حتى ابره

ومثل ظلك اتبعك وانا ممـــــدود
حتى اليسبقك مشيك ايــــــــجرّه

وتضويلي الدرب بالضيّ الأسود
وعيـــــــونك وسط الصباح كَمره

شكرا جزيلا موضوع اكثر من رائع
كلمت راقيه تنم على مدى احساسك العميق
وتظهر مدى جوهرك الثمين
اتمنى لك الابداع الدائم

تحياتي العراقي ويسلمو على الشعر الرائع
عاشت اناملك

شكرا لمرورك سلطان الغرام
نورتني

نورتيني ابمرورج
سلمى المنصور
انتي الارقى والابدع
تحياتي

شكرا للذوق الجميل في اختيار كل ما هوة جميل وجديد
تحياتي