قصيدة للمتغربين شعبية ~من المبدع والمميز بحر العشاق \بلال

الادارة الرائعة
تحية طيبة
من نكهة الشعر الشعبي
حيث جمال التعبير من مذاق اللهجه العراقية
فكيف واذ كان يغرف من صحن الغربة والشوق
على مدى المسافات
اليكم من المبدع والذي يغزو ساحات منتدانا في الاونه الاخيرة
غزال الابداع
بحر العشاق بلال

قصيدة للمتغربين شعبية

[ندعوك للتسجيل في المنتدى أو التعريف بنفسك لمعاينة هذه الصورة]

اليل هم رجعت شتريد وك ياليل

من وحشتك شيبت و الحيل ما ظل حيل

مثل الرماد اشتعل و ابقى احترك كلي

من اذكر امي الصبح من تكعد تصلي

يجاوبه

يا ما نصحتك انا , تذكّر شنساك

كتلك بلادك ذهب هو الذي سواك

و انت ابن هذا البلد لا تنكر الرباك

غشوك وصفوا الك دنيا و سعادة و خير

ما تدري شما هجر لازم يعود الطير

يردله

هسه انا وين اصبحت عنهم و وين اهلي

بس عين عندي بقت منها الدموع تسيل

اشتاكيت لاهلى انا و لكعدت اخواني

و كلمة هلا و مرحبا بشفاف جيراني

يجاوبه

شوداك لاهل الغرب شتسوي رحت هناك

من ترجع من الشغل منهو اليتلكاك

امك تحضر الغدة و اختك تصبلك ماي

جاي انت من الشغل مية هلا بهالجاي

و كلشي محضر الك و كاوي لك هدومك

و ابنك يشبكك شبك و يشاركك نومك

يردله

شتاكيت لاهلي انا و لكعدة اخواني

و كلمة هلا و مرحبا بشفاف جيراني

ملعون هذا الزمن ليوين وداني

خلاني اخلص الوكت بالحسرة و الياويل

يجاوبه

تشوفهم بالغرب كل واحد و ربعه

تكعد و مالك ربع و بعينك الدمعة

مو جنا نطلع سوة للجامع الجمعة

و الثوب ابيض حلو و من تمشي شمحلاك

اي لعد ما تكلي منو الوداك هناك

يردله

الليل بس يم هلي ثوب الفرح لابس

و محلاهه من تنسمع صفارة الحارس

زاد اهلي طيب يظل لو بس خبز يابس

و مكره زاد الغرب بالمنة و التذليل

يجاوبه

ببغداد عدنا حلو لمن يصير غروب

عالجسر فوك الجسر تمشي انت و المحبوب

و دجلة تحضنك حضن و تحس العمر ما فات

و محلاهه لمت هلك و كاعد بالكريعات

يردله

شتاكيت انا لموطني و احسد اللي شافة

و لماي دجلة العذب من تشربه تتعافه

يا ريت منه العسل لو رادن شفافة

و انا الك مشتاك يا جاي ابو الهيل

يجاوبه و هنا يحسمها

و لو تجي و تفتر بعد و تدخل على المنصور

طيبة و حنان و عشك و طيور احلى طيور

و العيدعدنا حلو والله يا عيدي

يله نقارن سوة و ايدك تظل بيدي

ايفل و برجه و هله و لندن و كل تكساس

يروحون فدوة و نذر لشارع ابو نؤاس

[ندعوك للتسجيل في المنتدى أو التعريف بنفسك لمعاينة هذه الصورة]

وتبعنا اوراق تألف الخوض في ربوع السلام
تلك محطات توانت بالورود
خضراء في اسفارها