ابوذيات ادخل واختار الي يعجبك

مشغولين بيمن من شغلكم
ولو مو شغلي هذا من شغلكم
بعد ماراح ابجي وانشغ الكم
اموتن راح واخصمهه القضيه
.......................
اغيابك فرح الشامت واذني
وماتن من رحت ذني وذني
الك جرحين بجني واذني
الغياب وضحكه الشامت عليه
......................
الك من تجي اوكف منحني اني
وحنان لكلبك اعصر من حناني
تعال وشوف بعدك من حناني
الدمع يوم الرحت حناها اديه
.....................
ضروفي تكظني ماتسمح امركم
وعسل ينزل على كلبي امركم
انه بيا حق اطالبكم وامركم
الامر الكم وانا التنفيذ اليه
.................

هجم حبك على كلبي غزلها
وروحي بمغزل الحسرة غزلها
القصايد بس الك لايك غزلها
وانه الممنون من تنشد عليه
..................
غيرك ماحلى بعيني ولاطاب
ولا دونك دخل كلبي ولا طاب
ياجرحي وياك ماهود ولا طاب
دم ينزف ولا حسيت بيه
................
لغيرك ماجرى دمعي ولا هل
وغاب الكمر من شافك ولا هل
ولالي احباب بالدنيا ولا اهل
بس انته وكطعت الوصل بيه
..................
اشفنه من عمرنا شفتهمنه
وهمنه كبال عينك شفته همنه
ذبحنا وفوك ذبحه شفتهمنه
يكلهم بالذبح تعبلي اديه
.............

كبل من اصل طيب فرعينه
هسه العكل طاحت فرعينه
الوكت يخزر عليه فر عينه
ودرت عنه وبقت عينه عليه
..............
ابطل بالعصا سحرك وكيداك
واخذ حقي انا واكيدك
جوه وتشلع بكلبي و كايدك
تجر ايدك شنو ماتحس بيه
...................
مو ماصخ بطبعي مالح اني
وحتى من ارد اعاتب ماالح اني
سهم هجرك رماني مالحاني
لان حبك درع صداه اليه
..............
بلهيب الشوك كل اعضاي وجن
واتيهت السنين المضت والجن
مثلك ماشفت بلا انس لا جن
جلت قدرته السواك اليه
..................

ياغالي طال هجرك مر علينه
وحتى الزاد صاير مر علينه
اذا انته تحبنه مر علينه
تعال لجيتك روحي هديه
.................
وحك رصعه اخدودك وحك شفتاك
نسيت بيوم وسط الروح شفتك
اشيخلصني بعد شرتاح شفتك
وانته ابعدك وقربك اذيه
................
اعامل دوم ناسي ابطيب واخلاص
ويمته من المصايب افك واخلص
اخ عندي يصح ناطور واخ لص
وبين اثنينهم تاهت عليه
...............
اكوم اجلالن لحسنك وقف لك
واسجل روحي باسمك وقف لك
بنص كلبي احضننك واقف لك
وطب بصدري واقفلكم سويه
.................

الك ياما تعبت والك داريت
تلاكينه شجاك الوجه داريت
احتركت ومن نخيتك ليش داريت
على نفطك وانه النيران بيه
...............
ساعه اتصير فوكي ساعه دوني
ساعه اتصير طيب ساعه دوني
طحت ويصيح صوتك ساعدوني
اليمد ايده الك من نعله على ابيه
.................
لسانك لو يحبني شاطراني
اكرهه اللي بحبك شاطراني
خذت 100 بمحبتك شاطر اني
اذن غصبن عليك اتصير اليه
...................
شبيك محمل عليه بشر طين
نار وما اظن اصلك بشر طين
اعوفك واهجر كليبك بشرطين
تموتني وعمر تحزن عليه
................

اشتظن جيتك شفتني ماشفتني
ودرت الوجه جنك ماشفتني
افتك كتلي كتلك ماشي فتني
اشتفت صاير رماد شتلكه بيه
..............
اشجاب احزانك وهمك لهماي
وانا جروحي من جدمي لهاماي
اشعلت نارين مايلحك لها ماي
نار الشوك وبعادك عليه
....................
ثوب العشرة مااكصرة ولا كف
وابطل لاتظن منك ولا كف
مايحتاج لام الها ولا كاف
مكانك بالكلب غصبن عليه
................
اذن كلبي باسمك هاكذ اذانه
اموت ولا اكلك هكذانه
كلبي طفل جاهل هاك اذانه
الويها كبل لايعم عليه

جرحي مايفيده اضماد ينشد
نسوني وماكو بالخلان ينشد
صرت طير بقفص مجروح ينشد
مواويله ودمع عينه سويه
.............
جنت عمي وابويه وانته خالي
حسبت مليان تطلع انته خالي
الغريب اللي فزعلي وانتخالي
وانته ولا يحن كلبك عليه
.......................
انه بحبك اصيرن شاعر اني
لان متغير انته شاعر اني
اشك ثوبي وانتف شعري اني
وعلى راسي ادك باثنين اديه
...................
اشد حبل الوصل والكاه محتال
بسسب انك تعذب الروح محتال
سكن كلبي ورضينه تكون محتل
وجبتله الكرسي وعليته عليه
...............

كافي من البعد ياترف بس بس
ومنو باذنك على الهجران بس بس
كبل تركض تجي لو صحت بس بس
شجاك اشغيرك هسه عليه
..................
هله وميه هله والفين مرة
وعليك ارياكنه ياترف مرة
شيضرك بالسنه لو جيت مرة
تصل يمي واحضنك بين اديه
...................
المغرب شفته بعيونك وعصراك
وهيجي الله وتجي بايدي وعصراك
عصر غيرك ترى ولى وعصراك
انتهت والله عصور الجاهليه
..................
انه اول من نزل بالشوك وحيه
حفظ حرمه حبيبه وخجل وحيه
اموت عليك واحيى وامت وحيه
انهجم عمري انا جم روح اليه
...............

تطيب الروح لو تشتم هواكم
وكلبي من الزغر صدك هواكم
هواها الناس ياذيني وهواكم
عذب لو هب نسيم على الوطيه
.......................
انا الما يوم خله وياك خليت
شجاك وبالظهر سجين خليت
اشعندي واشيعد من رحت خليت
صفه حتى اللي هم موش اليه
.................
اوعي بالضماير ردت يوعن
طحت ماشفت منهم كام يوعان
بدي وكلته اخوي الجان يوعان
مسح حلكه ابقميصي وعض اديه
...................
الفرح بجفاك يااسمر مات منه
رحت وانصب بعدك مأتم النا
التمنه انطاه ربك ماتمنه
وانا تمنيتك وماصرت اليه
.........................

عفينه ولاعرفنا اسباب شطاك
وعطشنا وما شربنا ماي شطاك
كلي الورطك تخون شطاك
وشخذ منك ثمن جرمك عليه
................
جنحك يوم عله عله مني
وصفت عله بزماني عله مني
جزى الله المصايب علمني
عدوي من صديقي الخان بيه
...............
شكثر هم بدليلي يما عانه
وتحمل كلبي ياما ياما عانه
عمي انته معاهم يامعانه
تهد وتفازع وتاهت عليه
..................
ها تعبني حبك ها اذاني
دخت ايا صلاتي ايا ذاني
اكول التويه مااحب هاي اذاني
من اهد اذني يهد حبك عليه
....................

امتحنته وطلع بدروسه ولا صح
اتخورس مايرد صوتي ولا صاح
ادورله دوه لعلته ولا صح
تركته للوكت يشفيه اليه
.................
بعد ماعتب لبابه وداره
جي لن الوكت فره وداراه
شكثر باره اله كلبي وداراه
اخوي ونكر كل طيب اليه
....................
عشرتك ليش كصرت ماطلته
وانه الدنيه اعلى مودك ماطلته
جنتلك فرصه سهله ماطلته
اخسرته بسبب بطرانك عليه
...................
الك شفتين تكتل ولعني
واحس بنار جنهن ولعني
شنو امخبل واكلك ولي عني
لو شارب نفط وجنون بيه
.....................

بعدك اماطل الدنيه ماطلتني
وجنت عنكود يمك ماطلتني
طليتك ذهب خايب ماطلتني
وتكل للناس زنجر بين اديه
...................
يون كلبي ولا بطلت ونتاه
وتاه ومادريت عليه ونتاه
انته امي وابوي وهلي وانته
الهوى والروح وانته النفس بيه
...............
اودك مااغير يوم ودي
ولو كلي جرح بجفاك وادي
اشما عندك رسايل شوك ودي
بلجن تطفي نار الشوك بيه
.............
واني احبي غرامك لازماني
واعليك انفطم كالو لازم اني
لانته ارحمتني لا زماني
ولايرحمني غيرك ترضى ليه
................

الطلع خسران مو انته هو انا
غشيم وجنت اضن شخصك هوانه
ابخنكتك جنت اصيرلك هوى انه
نفس تاخذي حتى اتعيش بيه
........................
شخصك بالحلم مامر ميانه
تعذبني وتكلي احنا ميانه
ابعطش شفتك صرت لاجلك مي انه
اشربتني وما كلت شكرا اليه
...................
مانتعب نجي امكيفين بعناك
وبعنه ارواحنه ومايوم بعناك
تدري اعيونه من تجي بعيناك
فرح والخوف ينطبكن سويه
..................
يل جبت العمر اطني وره اطني
احس بيك الوكت ورطه ورطني
يمته تفتهم حجيي ورطني
حرت بيك افتهمني اشلون بيه
......................

جفك لايمسني مسته حيله
وانا الما يستحيلي ما استحيله
عشرتي وياك صارت مستحيله
واضل ممنون لو تكطع الجيه
...................
رماد الود على فراكه ولعناه
وكلبنه اشما سكن شوكه ولعناه
شلي با ابليس اسبنه والعنه
غواني الحب شله الشيطان بيه
..............
احبك مو كفر حبي ولا اجرام
شصبر بالصبر ماضل ولا جرام
الكواكب حولك افترن والاجرام
جي لنك شمس وازود شويه
....................
حضر سويت لجلك من حضرتك
ونسيت انته وكفتي من حضرتك
وره خشمك تكلي من حضرتك
حضرتي الجنت امر وتاخذلي تحيه
..................

لان كلبي يحبك والهوى لك
اصير الماي لجلك والهوالك
ادوس اعلى المخاطر والهوالك
لجلك يالبعت عمرك اليه
...........
تعرف ليش حبيتك وردتك
حلو وتغار من شفتك وردتك
اذا تعطش دمع عيني وردتك
يمن حسنك امخلي اجنون بيه
..............
حبيبي الريم جنه والغزاله
ويزل وياي يامه والغي زله
اله ابيات شعري والغزل اله
اله روحي اذا يطلب هديه
..........
الاحبهه وياي شو زايد دلعها
سبتني بثوبها اليسطر دلعها
الكلب من حبها نيرانه دلعها
حركني وورثت روحي بيده
............
بشفه كل امل ماضلي وياسين
وياشفه البعد تضحك وياسن
تعال اقرى العديله انته وياسين
وغمض العين بيدك مو بديه

,,,,,,,,,,,,,,,,,,,,,,,,,,,,,,,,,,,,,
بطاقه دعوة من عندي تجي لك
وبالك ماتجي ازعل تجي ؟ لك
تجي كاشخ بكل قوتك تجي لوك
تجي وبيدك تسلمني الهديه

,,,,,,,,,,,,,,,,,,,,,,,,,,,,,,,,,,,,,,,,,,
اسمك سر بكل عضاي دورة
عزيز والك بالشريان دورة
اذا ماتثق هاك الكلب دورة
واذا غيرك لكيته اعتب عليه

,,,,,,,,,,,,,,,,,,,,,,,,,,,
الف الدنيا كلها وماتلفني
عنيد وغير شخصك ماتلفني
عمت عين المنيه ماتلفني
لان فركاك حيل اثر عليه


شعجب دفتر عشكنه ماتكلبه
وليش اللي يكلبك ماتكلبه
ترى كلبي بغيابك مات كلبه
كلب كلبي توفى وعم عليه

,,,,,,,,,,,,,,,,,,,,,,,,,,,,,,,
عليك القيت حجه والقي يامه
ويما براسك احجي والقي ياما
تدري الحشر يمتى والقيامه
القيامه والحشر زعلك عليه
يكلبي اياك ثم اياك واياك
وبالك من صديق الضحك وياك
يلملم بالحطب ويريد وياك
ويفرح من تشب نيران بيه

تبقى انته صديقي الوفي لو طال بعدك سنه
ونار الهجر بالكلب الها لهيب وسنه
حلل زماني الذبح ساطورة جابه وسنه
وماأنسى حبكم ترى لو كطعاني كطع
انته صديقي الذي مايوم وصله كطع
ولو رجع غالي الكلب من كلبي اكطع كطع
وان طار نص العمر يكفيني أشوفك سنه
,,,,,,,,,,,,,,,,,,,,,,,,,,,,,,,,,
شوف شلون سوة الدهر وارمه
وشوف شلون حط بالكلب ورمه
وشوف شلون كدر فشك وارمه
وشوف شلون ذبني على الوطيه