حبيبي والوكت مقفول

حبيبي والبخت مقفول
مانكدر على فتحه
حبيبي والكلب مجروح
لازيد علي جرحه
حبيبي والفرح ممنوع
لاتأملني بلفرحه
حبيبي والحديث يطول
وأعجز صرت عن شرحه
حبيبي الليل صار طويل
ومااضن يجي صبحه
حبيبي كافي لاتكرب
اخاف انك علي تصحه
وانه احزان وبيه هموم
ولاحبه بكربي مانصحه
عمري ماشفت راحه
كلبي انحبست افراحه
وبين الكلب بين الروح
خنجر يعتعت بذبحه
حبيبي الروح عليك اتلوب
ياروحي شكثر وكحه
يكلبي انكسرت وياي
وكسرك صعب لو صلحه
تبجي اسنيني وابجيها
وايامي علي تنحه
ماعندي امل وانطيك
ولاتكدر على منحه
لو اكتم اهوال الشوك
عيوني الهايمه تفضحه
حبيبي ارجوك لاتناحي
ذبل وكتي
وعزت تمطر افراحي
حبيبي العمر ماظل بيه
بس لحظات
بيهه انتفضت الاحزان
وصبت فوك قداحي
وانه الاعزل بلايه سلاح
وكتي ماخذ سلاحي
خلاني الوكت بيدك
تفرني فرت السبحه
وردة غصن وبكاعك
دمي بمنجلك سفحه
وادور عن ربح عمري
تساوه خسارته وربحه
ماعندي امل وياك
اسمي من الكلب مسحه
وخلني ذكرى خلني ضيف
مر ابساعة الشحه