لاتمسح دموعي شعندك وياهن...

لاتمسح دموعي شعندك وياهن
سولف غيرهن ذنّي افتهمناهن!
عله هذا الخذاك احچيلي يفهم بيك
واستوعب رموشك عرف معناهن؟
شلته ابينهن والچان بيهن طاح
...ذبّيته الگبل بعيونه خلاّهن!!
چا من شلته منهن ماحسبت يموت
ذاك الگالك ماعيش لولاهن؟؟
البداك اعله روحه بلحظه تغدر بيه
البداك اعله روحه سنينه بدّاهن!
المهم سولفلي عن هذا الجديد شلون
من يشرب عيونك يسكر وياهن؟!
تهجّه حروف خدّك واللغه البشفاك
لو صعبن عليه ماگدر يقراهن؟؟
عله صدرك حظنته وسلّمت وياه
تبدّن بين اديه والشعر غطّاهن؟
يخجل مثلي لو كلّش تماده وياك
الماسوّيتهن ويّاك سوّاهن؟؟
سترت الذكريات بخانة النسيان
خو مافرّعن وانجاب طرواهن؟
خاف يشم عطر من عندي عالقمصان
شد عيونهن واغسل خطاياهن..
ماعاتب بعد شيفيد بيك اعتاب
المافادن گبل هسّه اترجاهن
تره هنّه الوفه والصدگ هم صعبات
يگدرهن ردي وغدّار حاشاهن
لاتسال شموعي شلون اخذهه الليل
مومسألة ليل فراگ طفّاهن..
السنابل هيچ من فارگهن الفلاّح
طيّح روسهن وتراب خلاهن
ولاتحسدني هنه البقن بس ضحكات
باچر ينتهن وتموت ذكراهن
مرّات الطيور يغنّن من الظيم
فك باب القفص دمعات تلگاهن..
عن ياهن احچيلك قسوتك فرگاك
بياهنّه ابتدي واختملك بياهن!
ماتذكر ابّابك من وگفت شلون
اسولف والجدام اتعارك وياهن
وشفت چفوفك اللوحن بالله وياك
هيچ بهالسهوله وگلبك انطاهن!
ماتن كل صورّك بيدي من رديت
وانه وصفنتي اصورّك رثيناهن
انه وجفني ادْمَنّه الدمع والليل
عشرة عمر ومن الصعب ننساهن
شرجعلك محطات الورود تموت
اذا شافن قطار النده اتعداهن..

ارجع والسنين وعمري المصلوب

وجروحك برگبة من خطاياهن؟!

گتلك كلشي اتحده القصور اطيح

وقصور المشاعر مااتحداهن..
انت بلاوعي وهدّمت بيه قصور
وانه بلاوعي وهدّمتك وياهن
صرت بلاوعي وهدّمتك وياهن

تحياتي الكم
وهاي القصيدة اهداء الى من كان كل حياتي
لمــار العراقيــة

ياسلام لمار شعر شعبي روعه يسلم الاختيار الراقي
الف تحيه لك ياورده

[ندعوك للتسجيل في المنتدى أو التعريف بنفسك لمعاينة هذا الرابط]

انت الاروع
تحياتي الك
نورت

شكرا لامار على الشعر الجميل تحياتي لحظرتج

يسلمووووووووووو
لـــــــــــــمار
على الشعر الجميل ودومك مبدعه

أحزان قلبي لا تزول.....حتى أبشر بالقبول

وأرى كتابي باليمين.....وتقر عيني بالرسول

[ندعوك للتسجيل في المنتدى أو التعريف بنفسك لمعاينة هذه الصورة]

تحياتي الك كرار
نورت عيوني

يدللوو وليد
نورت عيوني
تحياتي