ها حبيبي شعر شعبي

ها حبيبي الدنيا بعوينك بساتين ومعاني

ها حبيبي لجيّتك قداح ملّيت الصواني

گالت الوادم نساك واني أگلهم ما نساني

واعدت كل النجوم لموعدك واگعدت أتاني

أكتب أسمك أول الصفحة وورا أسمك ماكو ثاني

وأنتظر والليل طول الليل تحسبني الثواني

لحد ما خيط الفجر جر الضوه وشوگك چواني

*****

مشتهي أبچيك إعله صدري دموع من عطابي تنزل

واحضن طيوفك اونامن من تجيني بليل ممحل

وتعله تعله بسما أشواگي مثل نجمة صبح وتذل

ما اريد هواي احبك كافي اشوفك شمس بالظل

ما اريدك أنت آني وآنه أنت العشگ يكتل

ما اريد نصير روحين بجسد ونموت بالسل

ماي تگطر نار گلبي عليك وأنت بماي تشعل

*****

عاهدت گلبي بمحبتك ما يظل عليك نازف

ولا يذوب عليك من اسمك يرطب ريگ ناشف

ولا أضم اعليه خيالك وأنت بين عيوني واگف

وآنه وانت بليل وبسچه غريبه وگمر خايف

وانه وانت ثنينه نغيّم حچي ونمطر سوالف

تجبر لساني إعله حبك واندم وأبحر وأجازف

وارجع بگد ما ندمت عليك أبوسك عالشفايف

*****

وارجع وصفناتي بيه يخازرني عيون ذيب

ووجهي سكته مثل خطبة مستحي وزفة غريب

وأشرگ بعبرات هجرك غصة وادفعها ابنحيب

كل خسارات الزمان عليه دارن يا طبيب

شيّبن راسي العنيد الچان ما يقبل يشيب

الچان ما يرضه بحبيب والك كلك يا حبيب

وأختنگ ويهب هواك منين ما اشمه يطيب

يسلموياورده

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

انرت
الف تحية الك ياوردة

» شعر شعبي *الغدر*
» شعر شعبي على العراق
» قصيدة عتب شعبي