هل تحصنين اطفالك يوميا بالاذكار وايات التحصين؟؟

تحصنين اطفالك يوميا بالأذكار وايات التحصين ..؟؟ موضوع يستحق الاهتمام

بصراحه عندي موضوع من زمان ودي اكتبه لكن ماتوقعت ان فيه امهات ممكن غافلين عنه
وقلت يمكن احد ذكره قبلي لكن
الي شجعني اكتبه بصراحه جارتي بجد صدمتني
كان ولدها عمره سنتين يصيح ويبكي بشكل مو طبيعي قلت لها وش فيه قالت دلع
قلت يمكن نسيتي ماحصنتيه اليوم
قالت ايش؟
الله يصلحك وش تحصينه انا ماعمري حصنت عيالي ولا قريت عليهم حرف
عاد انا انصدمت صدمة عمري
لان لازم احصنهم كل يوم لانهم اشوفهم لازم نحصنهم لانهم مازالوا صغارنا لا يعرفون تحصين انفسهم
دامها ماتحصن نفسها
فمابالك بأولادك !!!
المهم على طول طرى في بالي الحريم الي يجونها لانها توها والده من شهرين ورجعت من عند اهلها
وبدوا جاراتنا يزورونها وبحكم اني جارتها وصديقتها كنت كل ماجاها حريم اروح اوقف معها
واساعدها وكانوا الحريم ماشاءالله كل يوم فوق العشره حريم
وهذي تشيل المولود وهذي تمدح صحته وهذي تمدح خشمه والثالثه مدري وش تمدح
انا على طول تذكرت وسألتها
يافلانه لايكون يوم كانوا يجونك الحريم يباركون ماكان محصن مولودك
قالت لا والله ولاعمري فكرت اقرا عليه

انصدمت واستغربت من كلامها
وبعد نقاشات اكتشفت انه كسل وجهل منها
عاد فهمتها الطريقه ونصحتها تقرا على عيالها
ومن ذاك اليوم وانا اقول يمكن فيه امهات يغفلون عن هذا الشي
فقلت انزل الموضوع عسى الله يحفظ عيالنا يارب
الحيـــــــن ندخل في الجد :
ايات تحصين الاطفال وبعض الطرق في تحصينهم والاوقات المناسبه :
الايات والاقوال كالتالي :
البسمله وقراءة الفاتحه ثم قرأة المعوذتين والاخلاص واية الكرسي والكافرون وخواتيم البقره (( اخر ايتين في سورة البقره))
وقول اعيذك بكلمات الله التامه من كل شيطان وهامه ومن كل عين لامه
هكذا كان رسول الله صلى الله عليه وسلم يعوذ الحسن والحسين
وبسم الله الذي لايضر مع اسمه شي ..
والطريقه كالتالي :
اما بالقراءه مباشرة في اذن الطفل
او وضع اليد على رأسه اوصدره
وبعد القراءه النفث عليه ومسح جسده باليدين بعد النفذ فيهما
اما اوقات التحصين فهي في اي وقت ولكن الافضل :
بعد صلاة الفجر مره حتى وان كانوا نايمين
ومره اخرى بعد صلاة المغرب واهم شي بعد المغرب
لان رسول الله صلى الله عليه وسلم قال :
اذا غربت الشمس فكفوا صبيانكم (( اي امسكوهم وجلسوهم )) فأنها ساعه ينتشر فيها الشياطين
فمن اسباب اذى الشياطين للاطفال ترك الاطفال يعبثون ويصرخون ويلعبون ويتراجمون بالحجاره
وغيرها عند غروب الشمس حيث انه وقت تنتشر فيه الشياطين مثلما ذكرنا رسولنا الكريم وهذه احاديث صحيحه تقدرون تسوون بحث وتعرفون اكثر

يعني اذا حلت ساعة المغرب الين العشاء لابد من تحصين الاطفال ومناداتهم للجلوس والهدوء وشغلهم بأي شي مثل التلوين او الرسم او الاشغال اليدويه المتعدده والمختلفه
اتمنى من كل ام قرأت الموضوع ان لاتتساهل فيه فالموضوع مهم
وهؤلا اطفال لايستطيعون تحصين انفسهم فهم امانه عندنا ونحن المسؤلون
فياليت نخاف الله فيهم ونعطيهم من وقتنا وان شاءالله مافيه وحده منكم الا وتحصن طفلها

اتمنى تكونوا استفدتم من الموضوع