زنجيـــــــــل أبوذيــــــــــــة للشــــــــــــــاعـــــــــــــــر نـــــــــــــــــائــــــــــــــــل مـــــــــظـــــــــــــفـــــــــر

لأنك بالتزامك مومن اهلك
أخاف اشيل ذنبي مو من اهلك
منو بگدي يحبك مو من اهلك
منو بگدي يحبك من عشرتك
وتمنه ايصير إصبع من عشرتك
وانه اشكظيت خايب من عشرتك
أعد بسنين عشرتنه وهي اجروح
واحس اويه النفس يطلع وهج روح
واخيرا گتلي ودعني وهج روح
أروحن وين ماأگدر هوه انته
وانه الماهان من أجلك هونته
إلي بدنياي شي واحد هو انته
وحرت بين انتركته وانتبعته
وانه الونيت والون ون تبعته
ماباعك حبيبك وانته بعته
حبيبك باع عمره واشترك بيه
وحزن گلبه اعله حزنك واشترك بيه
وبعد شدوس گلبي وشترك بيه
جبل حبه وتگلگل لن تگل بيه
ويدنيه اشما دفعتيه لن تگلبيه
واذا تنساه يگلبي لنته گلبي
ولا اريدك بعد وبصدري احملك
وحبيبي اشلون ترضه بصد رحم لك
إذا حملك يتعبك صدره حملك
إلي وروحي الأرض واشگد دولها
وتداوي الداء لو بالمخ دولها
بس العين مايحصل دوه الها
دواها العين خلها من تقر بيه
وتصب كلما تشوفك منته قربي
ولك شيصير حبك من تقر بيه
وتحبني انته يقين ابصدري مو شك
ألف شوكة السكوت ابصدري مو شك
انذبح گلبي وتشضه بصد رموشك
وعرف محد يدفنه وشي دفن شي
وعگب صدره المواگد شي دفن شي
كفر من رسم غيرك شي دفنشي
واظن للجنة يدخل من يرسمك
وحبيبك يمسح اسمه من يرى اسمك
بسمك حبي جمالك من يرى اسمك
وانه الليل بعيونك شفته كحله
وشفت شمس الأصيل وشفتك احله
العسل من ضگته گلك شفتك احله
إذن لو من شفاهك بستك اشفه
إذا انته المات يعدل بس تكشفه
اشتضن حبك يضعفك بس تكشفه
وعلي تخفي اهتمامك وكتراثك
وانه المن مات گلبي وك تراثك
نسيت الحب الاول وك تراثك
صدﮒ ينسه تراثه هسه جيلك
وتشوف اسواج عيني هالسجي لك
وانادي وماتگلي هسه اجيلك
صحتلك يــا وصارت كبرى يائي
واذا رائيت بالشط كب ريائي
حبيبي شلون تجرح كبريائي
وتذلني اگبال كل ناسك وناسي
وبقيت بصحره شاتلني وناسي
ناس اتگول لاتسكت وناسي
لأن كلش مذلتي لاگتلهم
وجبل حبي المقدس لاگه تلهم
گالوا حيل ذلك لا گتلهم
عناية احتاج گلبه وجاي اعانيه
وخفيت اشكثر منك جاي اعاني
تمرمرني امن ازورك جايع آني
شكثر ندمان چي بيتك عتبته
وعرفني الباب من دگتي وعتبته
عتابي اوياك چي احبك عتبته
گلبي اشلون يمهم وك كسرته
أسير وذل شجالك وك أسرته
گبل چانت إسرتك وك إسرته
إسترك هسه سمتني الضحية
=========