خطوة شوك وخطوة ورد

صعبة اتحمل غيابك
بس الاصعب لما تكون انت حدي ومالاقيك
المستحيل الفارد ظلو
فوق خيالي وفوق خيالك
المسكّر البواب وناطر
تحت حفاف الشبابيك
هو وحدو العم يقتلني
هو وحدو اللي مخليك
هالطرقات الممدودة
على صدر الأرض
وعكتاف الطرقات معربش
خطوة شوك
وخطوة ورد
اي خطوة فيهون انت
مينك انت
وهالسما هالحضن الواسع
مش عم بتذكر ياحضنك
هو سما بتحمل دفى
ولا أرض بتحمل برد
صعبة اتعلئ بوردة
وبالاخر مالاقي الورد
ومالاقيك
صعبة يغمرني هالبرد اللي معانقني
ولما فتش على حضنك
لاقي حضنك
وحدو بس اللي مدفيك
صعبة اتحمل غيابك ياهالحاضر
يا راجع من بعد غياب
وبعدو مسافر
ياكلمة حب ومكتوبة
وضايعة بسطور الدفاتر
صعبة ضل
بقربك اكتر
وكل ماقرب أنت تفل
شوبدي بصورة مرسومة
فيها رسمك
شوبدي بلمسات ايديك
بدي روحك
مش عم فتش ع جسمك
اه مني ومن غيابك
واه منك
اعطيني فرصة ياحبيبي
اصحى بشي ليلة لحالي
اتصالح فيها مع حالي
اعطيني فرصة
امحي من ليلي القمر
حتى ماشوفك بخيالي
اعطيني فرصة
احمل يأسي على كتافي
وامشي ع دروب السفر
اعطيني فرصة ابعد عنك
اهرب منك
ولما ترجعلي ياغالي ماتلاقيني
وتضيعني بشي طريق
جرب شي مرة اللي عشتو أنا بغيابك
وانكوي بنار الحريق
بدي اتعود ع غيابك
حتى لما تكون حدي
بدي ادعي ما لاقيك